محکمہ موسمیات نے پیشگوئی کی ہے کہ ملک کے مختلف حصوں میں آئندہ دنوں کے دوران موسم میں تبدیلی کا امکان ہے، بعض مقامات پر بارش جبکہ پہاڑی علاقوں میں برفباری متوقع ہے۔
محکمہ کے مطابق ملک کے بیشتر علاقے خشک موسم کی لپیٹ میں رہیں گے، تاہم بالائی خیبر پختونخوا، گلگت بلتستان اور ان سے ملحقہ علاقوں میں مطلع جزوی ابر آلود رہنے کے ساتھ چند مقامات پر بارش ہونے کا امکان ہے۔
ماہرین کے مطابق مسلسل خشک موسم اور فضائی آلودگی کے باعث مشرقی پنجاب کے اضلاع میں اسموگ کی شدت برقرار رہے گی۔ شہریوں کو احتیاطی تدابیر اختیار کرنے کی ہدایت کی گئی ہے۔
اسلام آباد، مری، گلیات اور گردونواح میں موسم خشک اور سرد رہنے کا امکان ہے، جبکہ لاہور، گوجرانوالہ، قصور، شیخوپورہ، اوکاڑہ، فیصل آباد، سیالکوٹ، خانیوال، رحیم یار خان، بہاولپور اور ملتان میں بھی اسموگ چھائے رہنے کی توقع ہے۔
محکمہ موسمیات کا کہنا ہے کہ سندھ اور بلوچستان کے زیادہ تر اضلاع میں موسم خشک اور قدرے سرد رہے گا، البتہ ساحلی علاقوں میں مطلع جزوی ابر آلود رہنے کی پیشگوئی کی گئی ہے۔
ادارے کے مطابق چترال، دیر، سوات، کوہستان، کرم اور مانسہرہ میں بارش کے امکانات موجود ہیں، جبکہ گلگت بلتستان کے بعض مقامات پر بارش اور پہاڑوں پر برفباری متوقع ہے۔
اسی طرح آزاد کشمیر میں مطلع جزوی ابر آلود اور موسم سرد رہنے کی پیشگوئی کی گئی ہے۔
گزشتہ چوبیس گھنٹوں کے دوران ملک کے بیشتر علاقوں میں موسم خشک جبکہ پہاڑی علاقوں میں سرد رہا، اور پنجاب کے مشرقی اضلاع اسموگ کے زیرِ اثر رہے۔
