ڈپٹی انسپیکٹر جنرل آف پولیس (ڈی آئی جی ٹریفک) کراچی پیر محمد شاہ نے کہا ہے کہ ٹریفک کنٹرول کیمروں کی نگرانی کے دوران وائرل ہونے والی دو تصاویر کی تحقیقات جاری ہیں، جن میں لوگوں کی نجی سرگرمیوں کو دکھایا گیا ہے۔
پروگرام “رپورٹ کارڈ” میں گفتگو کرتے ہوئے انہوں نے بتایا کہ پیر تک ممکنہ طور پر تحقیقاتی رپورٹ سامنے آ جائے گی کہ یہ تصاویر واقعی ٹریفک کنٹرول کیمروں کی ہیں یا پرائیویٹ کیمروں سے لی گئی ہیں۔
ایک سوال کے جواب میں ڈی آئی جی نے خبردار کیا کہ نمبر پلیٹ میں جعلسازی کرنے والے چھوٹے مسائل سے بچنے کے لیے خود کو بڑے خطرات میں ڈال رہے ہیں۔
انہوں نے مزید کہا کہ جعلسازی کرنے والی تمام گاڑیاں بلیک لسٹ کی جائیں گی اور پکڑی جانے پر سیدھی ایف آئی آر درج کی جائے گی۔
سندھ میں بغیر نمبر پلیٹ چلنے والی گاڑیوں کے خلاف سخت کریک ڈاؤن کے احکامات:
دوسری جانب انسپیکٹر جنرل آف پولیس (آئی جی) سندھ غلام نبی میمن نے صوبے بھر میں بغیر نمبر پلیٹ چلنے والی گاڑیوں کے خلاف سخت کریک ڈاؤن کے احکامات جاری کیے ہیں۔
آئی جی آفس کی جانب سے ایڈیشنل آئی جی کراچی، تمام رینج اور زون کے ڈی آئی جیز، ضلعی ایس ایس پیز ، ڈی آئی جی سی آئی اے اور ایس ایس پی اینٹی وہیکل لفٹنگ سیل کو لکھے گئے خط میں کہا گیا ہے کہ دیکھا گیا ہے کہ صوبے بھر میں روڈ پر بہت سی بغیر نمبر پلیٹ والی گاڑیاں چل رہی ہیں۔
خط کے مطابق ایسی گاڑیوں کی نشاندہی کر کے ان کے خلاف موٹر وہیکل آرڈیننس اور متعلقہ رولز کے مطابق سخت ایکشن لیا جائے۔
خط کے متن کے مطابق ایسی گاڑیوں کے خلاف سخت کریک ڈاؤن کیا جائے اور اس کی رپورٹ روزانہ کی بنیاد پر آئی جی سندھ کو ارسال کی جائے۔
