پنجاب حکومت نے فضائی آلودگی کے باعث موٹر بائیک سواروں کے لیے ماسک پہننا لازمی قرار دے دیا۔ سینئر وزیر مریم اورنگزیب نے بتایا کہ دہلی، چندی گڑھ، گرداسپور، لدھیانہ اور پٹیالہ سے چلنے والی ہوائیں لاہور کی فضاء کو آلودہ کر رہی ہیں، جبکہ ملتان، بہاولپور اور بہاولنگر کے علاقے بھی بھارت سے آنے والی فضائی آلودگی سے متاثر ہو رہے ہیں۔
انہوں نے مزید کہا کہ تعمیراتی مقامات پر حفاظتی اقدامات یقینی بنانے اور سامان ڈھک کر لانے والی گاڑیوں کی سخت نگرانی کی ہدایت کی گئی ہے۔
مریم اورنگزیب نے شہریوں کو تاکید کی کہ موٹر بائیک پر سفر کے دوران ماسک لازمی پہنیں، گاڑیوں کے شیشے بند رکھیں اور گھروں کے دروازے و کھڑکیاں بھی زیادہ دیر تک کھلی نہ رکھیں۔
سینئر وزیر نے کہا کہ دوپہر ایک سے 5 بجے کے درمیان ہوا میں معمولی بہتری متوقع ہے جب کہ دوپہر میں آسمان صاف لیکن ہلکی دھند رہے گی۔
مریم اورنگزیب کا کہنا تھا کہ لاہور سمیت دیگر شہروں میں پانی کے چھڑکاؤ اور اینٹی اسموگ گنز کا استعمال جاری ہے، اسموگ سے بچاؤ اور کمی کے لیے ہر شہری کا کردار بڑی تبدیلی اور کامیابی کی وجہ بنتا ہے۔
