سی سی ڈی رحیم یار خان کے مبینہ پولیس مقابلے میں خواجہ تعریف گلشن عرف طیفی بٹ ہلاک ہوگیا۔
ذرائع نے کہا کہ طیفی بٹ کو لاہور منتقل کیا جا رہا تھا، تھانہ کوٹ سبزل صادق آباد کے علاقے میں طیفی بٹ کو اس کے ساتھی پولیس سے چھڑا کر فرار ہوئے۔
پولیس کے مطابق طیفی بٹ کو ساتھیوں سے چھڑوانے کی کوشش کی گئی، اس دوران طیفی بٹ اپنے ہی ساتھیوں کی فائرنگ سے ہلاک ہو گیا۔
طیفی بٹ کی لاش کو مردہ خانے منتقل کر دیا گیا، پولیس کی بھاری نفری موقع پر موجود تھی۔
رحیم یار خان میں طیفی بٹ کے ساتھیوں کے ساتھ فرار ہونے کا مقدمہ درج کر لیا گیا، مقدمہ ڈی ایس پی سی سی ڈی ماڈل ٹاؤن لاہور سید حسین حیدر کی مدعیت میں درج کیا گیا۔
ایف آئی آر کے مطابق طیفی بٹ کو گرفتار کر کے لاہور لے جا رہے تھے 2 گاڑیوں میں سوار ملزمان نے فائرنگ کر دی۔
فائرنگ سے ایک پولیس کانسٹیبل نور گولی لگنے سے زخمی ہو گیا، ملزمان نے طیفی بٹ کو ہتھکڑیوں سمیت اپنی گاڑی میں بٹھایا اور فرار ہو گئے۔
لاہور پولیس نے گوگی بٹ کے گھر پر چھاپا مارا جب کہ گوگی بٹ ساتھیوں سمیت پہلے سے ہی فرار ہوگیا تھا۔
گوگی بٹ کی گرفتاری کے لیے پولیس نے چھاپہ مارا، گوگی بٹ چند دنوں سے انڈر گرائؤنڈ تھا، پولیس نے کہا کہ جلد گرفتار کرلیا جائے گا۔
گوگی بٹ کی پرانی رہائش گاہ کے قریب گوال منڈی نامعلوم موٹر سوار کی فائرنگ کی گئی، دو نامعلوم موٹر سائیکل سوار آئے اور گھر کے قریب کلاشنکوف کے فائر کیے۔
پولیس ذرائع نے کہا کہ پولیس نے نامعلوم افراد کی جانب سے کی جانے والی فائرنگ کے خول قبضے میں لے لیے۔
