پاکستان تحریکِ انصاف (پی ٹی آئی) نے خیبر پختونخوا اسمبلی میں امن جرگہ بلانے کا فیصلہ کیا ہے، جس کا مقصد دہشت گردی کے خاتمے اور پائیدار امن کے قیام کے لیے متفقہ حکمتِ عملی تیار کرنا ہے۔ وزیراعلیٰ ہاؤس پشاور میں پی ٹی آئی کی سینیئر قیادت کا اہم اجلاس منعقد ہوا، جس میں چیئرمین بیرسٹر گوہر، وزیراعلیٰ سہیل آفریدی، صوبائی صدر جنید اکبر، اسد قیصر سمیت دیگر رہنماؤں نے شرکت کی۔
اجلاس میں صوبے کی امن و امان کی صورتحال پر تفصیلی غور کیا گیا، جس کے بعد فیصلہ کیا گیا کہ خیبر پختونخوا اسمبلی میں ایک جامع امن جرگہ بلایا جائے گا۔
ذرائع کے مطابق امن جرگے میں سابق وزرائے اعلیٰ، سابق گورنرز، علمائے کرام، جرگہ مشران، سول سوسائٹی کے نمائندے، وکلا اور دیگر اہم شخصیات کو مدعو کیا جائے گا۔
جرگے کا بنیادی مقصد دہشت گردی کے خاتمے اور پائیدار امن کے لیے متفقہ لائحہ عمل طے کرنا ہے۔
وزیراعلیٰ خیبر پختونخوا سہیل آفریدی نے اس موقع پر کہا کہ صوبے میں امن کے قیام کے لیے پولیس کو جدید آلات، بہتر تربیت اور مطلوبہ وسائل کی فراہمی حکومت کی اولین ترجیح ہے۔
اس سے قبل سہیل آفریدی نے باڑہ میں امن جرگے سے خطاب میں کہا کہ میری نامزدگی پر اعتراضات اٹھائے گئے، ضم اضلاع کے بقایاجات فوری ادا کیے جائیں، ہمیں بھیک نہیں چاہیے ہمیں اپنا حق دیا جائے۔
انہوں نے اعلان کیا کہ ہر ضلع میں امن جرگوں کا انعقاد کریں گے۔
