بھارتی دارالحکومت نئی دہلی دنیا کے سب سے آلودہ شہروں کی فہرست میں پہلے نمبر پر آگیا ہے۔ دیوالی کے موقع پر کی جانے والی آتش بازی کے باعث نئی دہلی کا ائیر کوالٹی انڈیکس 772 تک پہنچ گیا۔ بھارت میں دیوالی کے تہوار کی وجہ سے لاہور سمیت پاکستان کے مشرقی شہروں کی فضاء بھی متاثر ہوئی۔ دنیا کے آلودہ ترین شہروں کی فہرست میں لاہور آج دوسرے نمبر پر ہے۔
اور صبح کے وقت شہر کا اے کیو آئی 245 ریکارڈ کیا گیا۔ لاہور میں اوسط اے کیو آئی 210 سے 240 کے درمیان رہنے کا امکان ہے، جسے انسانی صحت کے لیے انتہائی مضر قرار دیا گیا ہے۔
رپورٹ کے مطابق نئی دہلی کی آلودگی کے اثرات آج لاہور میں دھند اور اسموگ کی صورت میں نظر آئیں گے۔
دھرمشالہ سے آنے والی ہوائیں 5 کلومیٹر فی گھنٹہ کی رفتار سے گوجرانوالہ، لاہور اور فیصل آباد کی طرف بڑھ رہی ہیں۔
پنجاب بھر میں متعلقہ ادارے الرٹ ہیں، اسموگ ہاٹ اسپاٹس پر اینٹی اسموگ گنز استعمال کیے جا رہے ہیں، اور عوام کو ماسک پہننے اور احتیاطی تدابیر اپنانے کی ہدایت دی گئی ہے۔
ائیرکوالٹی انڈیکس کی درجہ بندی
ادارہ برائے ماحولیاتی تحفظ پاکستان کی درجہ بندی کے مطابق 0 سے 100 تک انڈیکس کو سبز اور مثبت جبکہ 101 سے 200 تک انڈیکس کو قدر آلودہ مگر قابل برداشت کی کیٹیگری میں رکھا گیا ہے۔
300 سے 500 کے درمیان انڈیکس آلودہ اور انتہائی آلودہ کی کیٹیگری میں آتے ہیں اور ایسے میں طویل مدت تک فضائی آلودگی کی صورت میں دل اور پھیپھڑوں کے مریضوں کو سانس لینے میں مشکل کا سامنا کرنا پڑسکتا ہے۔
ادارہ برائے ماحولیاتی تحفظ کی درجہ بندی میں بتایا گیا ہے کہ ائیر کوالٹی انڈیکس 500 سے زیادہ ہونے کا مطلب فضا شدید آلودہ ہے اور اس کے اثرات صحت مند افراد پر بھی پڑسکتے ہیں۔
